BARBA ZEF e JO’

BARBA ZEF E JO’

Fâ la me part par finta

dentri una storia vera

nol mi pareva bièl

e di sigûr no l’era.

Alc ancimò mi incolpa

di vèi metût ta grinta

di Barba Zef apena

la scussa da me pièl,

là ch’a coventa polpa

di ciàr ch’a dûl l’intèra

vita, sanc ch’a si svena

fin che la muart l’à vinta.

***

TAL LÂC

Il mont al disgredèa

i grops dal penc’ al râr,

salvant, fra ce ch’al pâr

e al è, la marivèa.

***

SERA

Il troi al si staca da strada

e al si invia su par i cuèi,

ma apena rivât a la svolta

al samèa ch’al si dismentèi

di lâ. Il ciampanîli, sunada

l’ora di gnot, cumò al scolta

las cîsas discori sotvòus,

intant che il tèi al samèna

l’odôr da sera su las cròus

insiema cun l’ultima ombrena.

***

L’ULTIM

Cui sarà il quint o il sest,

tu, jò, l’ultim coscrìt,

cumò ch’a son za lâz

in quatri? Nomo un tai

nol basta a la salût

di doi ch’a si ùlin ben.

Quant che il vêri al è râs

di blanc o ross, si rit,

quant ch’al è vuèit, si vài.

Cul pat sotintindût

di restâ simpri grâz

pal flât in plui ch’al ven

dì daûr dì dal câs,

savint ch’al è ad imprest.

***

IL MISTÎR

Gno pâri, muradôr

tâl e quâl che so pâri,

al à doprât madòn,

pièra, malta, ziment,

par alzâ simpri dret

il mûr, al pâr da vita.

Tal gno mistîr da lôr

doi al sarà ch’j’ impari,

se un qualchi alc di bon

al mi ven indiment

in ta fadìa ch’j’ met

su la pagina scrita.

***

Barba Zef e Jo’– Centro Editoriale Friulano, Udine 1985